مسلسل آدم و بيبا .

مسلسل آدم و بيبا

محمد الدولتلي / مصر 

الحلقة الرابعة
مسمع 1
بيبا :- يا آآآدم .. هو الغلطان .. يعني كان لازم يقول إنه بيسمعنا يعني ؟
آدم :- يعني إيه الكلام دا .. يعني أنا سامعك فعلا ولا إتجننت في عقلي
بيبا :- ماهو إنته سامعني أهوه .. و بترد عليا كمان
آدم :- ” بصوت باكي ” يعني أنا إتجننت .. يعني هالبس القميص بالمقلوب
بيبا :- قميص إيه بس .. إهدي كدا بس شويه
آدم :- ماما كانت دايما بتقولي ” يقلد أسلوب والدته ” العربيات هاتهبلك يا آدم .. أديني إتهبلت يا ماما .. يا ريتني كنت سمعت كلامك يا مااااماااا
بيبا :- ” بحده ” إهدي .. إهدييي .. هو فيه مجنون بيقول علي نفسه إنه مجنون مثلا ؟
آدم :- ” بصوت باكي ” مش عاااارف .. يمكن يكون دا نوع جديد من الجنان و أنا أول واحد يجيله
بيبا :- لا .. ما تقلقش .. الجنان كله نوع واحد .. و هو إلي هاتوصل نفسك ليه لو فضلت علي كدا
آدم :- يعني أنا ما إتجننتش ؟ .. طيب الراجل إلي بتقولي عليه ولا مامتك كانت بتحكيلك عليه دا راح المروستان ليه ؟
بيبا :- و مين قال بس إنه مجنون .. هو لما حكي للناس .. الناس هيا إلي إفتكرته مجنون
آدم :- يعني أعمل إيه أنا دلوقت ؟ .. أسكت خالص ولا أعمل إيه أنا بس
بيبا :- أول حاجه تهدي كدا و تعقل شويه بس كدا
آدم :- أهوه .. شفتي .. قصدك إني إتجننت
بيبا :- ” تصيح ” باااااااااس .. كفاااااايه
آدم :- حاضر .. طيب .. بسيت أهوه .. برضه أعمل إيه دلوقت ؟
بيبا :- ” تتنفس بنفاذ صبر ” تخلي الكلام دا بيني و بينك و بس .. لأن ماحدش هايصدقك .. و دلوقت تروح تنام علشان هانروح المرور من بدري .. ماشي ؟
*** فاصل موسيقي ***
مسمع 2
(صوت فتح السنتر و قفل باب السيارة )
آدم :- إحم .. صباح الخير
بيبا :- ” بصوت يستيقظ بكسل ” صباح الفل يا آدم .. ” تتمطع ” إممممم
آدم :- أه .. ماكانش حلم .. ” بصوت أعلي ” إزيك يا بيبا
بيبا :- أنا تمااا … ينهار أبيااااض .. إتأخرنا علي المرور
( صوت أقدام مسرعة )
عم عبده : – صباح العسل يا هندسه .. ثانيه واحده أطوقلك العربيه تطويقه حلوه كدا عالسريع
بيبا :- ” تصيح ” لااااا .. خليه يبعد البتاعه إلي في إيده دي عني
آدم :- إستني بس يا عم عبده .. إيه الفوطة دي
عم عبده :- دي فوطه زفره هاتخلي العربيه تلعلط كدا
بيبا :- يععععع .. إيه القرف داااا
آدم :- ليه فوطة زفره يا عم عبده .. ليه زفره
عم عبده :- دي تخلي البويه عال جوي
بيبا :- عال جوي ؟ .. دي هاتموت البويه
آدم :- لا إستني بس يا عم عبده .. أنا هاجيبلك فوطه تخليها عندك و تبقي تطوق بيها براحتك
عم عبده :- يا هندسه إسمع كلامي بس .. أنا عارف باقولك إيه .. إسمع إنته كلامي و مش هاتندم
بيبا :- أوعي تسمع كلامه .. هاتندم .. هاااتننننندم
آدم :- يا سيدي إسمع كلامي إنته بس .. سيبها و ما تعملش حاجه بالفوطه بتاعتك دي
عم عبده :- خلاص .. علي كيفك .. إنته حر يا هندسه .. أنا بس عايز أخدم لكن القول قولك
آدم :- ألف شكر يا سيدي .. خليني بس علي راحتي
عم عبده :- براحتك .. طريق السلامه يا باشمهندس
*** فاصل موسيقي ***
مسمع 3
( صوت زحام و أبواق سيارات )
آدم :- يا خاباااار عالزحمه
بيبا :- ماهو إحنا إلي جينا متأخرين يا آدم
آدم :- يالله بقي أهو يوم و نخلص من المشوار دا
صوت مخلص :- ” بصوت عالي أجش ” هاتفحص يا أستاذ .. معاك الورق .. وريني كدا
بيبا :- آدم .. آآآآدم .. أنا مش مرتاحة للراجل دا
آدم :- معلش يا ستي .. إحنا هانناسبه .. خلينا نخلص بس
المخلص :- ” يصيح ” تعالي كدا .. أقف هنا .. شوفلي معاك خمسينايه كدا
آدم :- ماشي .. إتفضل .. بس هو إحنا هانطول ولا إيه
المخلص :- حالا يا أستاذ .. يامحماااا
بيبا :- والله ما أنا مرتاحه
آدم :- إستني بس .. أهو جاي أهوه
المخلص :- تعالي هنا .. أقف في الطابور ورا العربيات دي .. شوفلي معاك فلوس كدا
آدم :- إتفضل يا سيدي .. باقولك إيه .. يوووه .. هو راح فين تاني
بيبا :- مش مرتاحه .. مش مرتاااااحه
المخلص :- يا أستاذ .. تعالي بسرعه .. شوفلي معاك فلوس كدا .. أيوه هات دول و تعالي أوقف عالشباك داعلشان تشتري شنطة الإسعاف و المثلث .. الطفايه معاك .. تمام .. تروح بعدها عالشباك إلي هناك دا و بعدين توقف علشان الظابط
آدم :- حاضر .. حاااضر .. بس إيه الفلوس إلي إنته أخدتها دي ياااا …
المخلص :- ثانيه واحده جايلك أهوه .. يا محمااااااه
بيبا :- ” بسخريه ” هيهيهيهيهييييييييه .. مش قولتلك من الأول مش مرتاحه
آدم :- أه يابن النصااااابه
نهاية الحلقة الرابعة
محمد الدولتلي