مسلسل آدم و بيبا – الحلقة العاشرة

مسلسل آدم و بيبا
الحلقة العاشرة

محمد الدولتلي/ مصر 

مسمع 1
“صوت خطوات لها صدي و صوت فتح و إغلاق باب السيارة ”
آدم :- صباح الفل يا بيبا
بيبا ” بصوت مستيقظ بكسل ” صباح الخير يا آدم
آدم :- لا إصحي و فوقي كدا .. عندنا النهارده مشوار محترم
بيبا :- ” بصوت نشط ” يلا بينا .. أنا جاهزه خلاص .. رايحين علي فين
آدم :- رايحين نجيب حاجات من حته أول مره أروحها في حياتي
بيبا :- طالما معاك اللوكيشن يبقي ما تقلقش
” صوت خطوات لها صدي ”
عم عبده :- صباح الفل يا هندسه .. ثواني هاطوقلك العربيه
آدم :- ماشي يا عم عبده .. بس بسرعه الله يخليك لأني مستعجل أوي
عم عبده :- علي طول يا باشمهندس .. حالا هاتكون عروسه
***فاصل موسيقي ***
مسمع 2
” صوت زحام و ضجيج و أغاني شعبية ”
بيبا :- إيه المكان دا يا آدم .. ” تصيح ” حاسب حاسب.. خد بالك و إنته ماشي
آدم :- يا سيدي حاسب .. إنته داخل كدا إزاي
بيبا :- ما تتصل بالراجل خليه يجيلك هنا و خلاص
آدم :- ما إنتي شايفه بحاول أتصل بيه تليفونه مقفول .. الله .. و الشبكه كمان وحشه هنا
بيبا :- طيب ما تسأل كدا عنه يمكن حد يدلك أسهل
آدم :- يا كابتن .. يا أستاذ لو سمحت .. ما تعرفش بيت سيد حلاوه فين ؟
أحد المارة :- آه .. دا في طريقي .. خدني معاك و أنا هاوصلك
” صوت باب السيارة يفتح و يقفل ”
المار :- إطلع كدا علي طول في يمين الجاي
بيبا :- آدم .. آآآآدم .. دا غير اللوكيشن خالص
آدم :- إنته متأكد إن دا الطريق الصح
المار :- أومال يا أستاذ .. إلا متأكد .. دا ساكن جنبي علي طول .. شمال الجاي بقي
آدم :- إيه دا .. الشارع ضيق أوي .. هانعرف ندخله
المار :- أيوه يا أستاذ .. إدخل ما تخافش .. تعالي عليا كدا شويه .. علي طول كدا .. أيييوه .. باااس هنا
” صوت باب السيارة يفتح و يقفل ”
آدم :- فين البيت بقي
المار :- معلش إنته قولتلي سيد أبو حلاوه مين
آدم :- لأ .. سيد حلااوه .. مش أبو حلاوه
المار :- آه .. أنا فاكرك بتتكلم عن واحد تاني خالص .. لا والله يا أستاذ .. ” يصيح ” واد يا رامي .. تعالي شيل من إيدي .. لامؤاخذه يا أستاذ .. سيد حلاوه دا ماعرفوش .. سلام عليكم
***فاصل موسيقي ***
مسمع 3
آدم :- آه يا نصاب يابن ال….
بيبا :- إحنا هانرجع إزاي دلوقت .. يادي النيله .. إيه إلي جاي علينا دا
صوت غير مريح :- عايز حاجه يا أستاذ
آدم :- لا .. لا متشكر .. أنا بس كنت باسأل علي واحد إسمه سيد حلاوه
الغير مريح :- ” يشنف بأنفه ” إنته بس تأمر .. أنا هاجيبلك كل إلي إنته عايزه أحسن من سيد حلاوه
آدم :- لا .. إنته فاهم غلط .. أنا مش عايز الكلام دا
الغير مريح :- قولي بس إنته عايز إيه .. حشيش .. بورشام .. بيسا .. إن شالله حتي بودره .. إنته بس عرفني دماغك إيه و كل إلي إنته عايزه موجود و هاريحك في السعر كمان
بيبا :- يا نهااااار .. إلحق يا آدم .. دا عايز يجيبلك مخدرات
آدم :- إيه يا عم .. حشيش إيه و بيسا إيه .. أنا ماليش في الحجات دي
الغير مريح :- ” بلهجه حاده ” أمال إنته واقف هنا ليه .. با قولك إيه .. ما تنزلي كدا
” صوت خطوات تركض من بعيد ”
صوت آخر يصيح :- إجري يلا يا سايكو .. حكوومه يلاااا
” صوت خطوات تجري ”
بيبا :- ” بصوت مرتعد ” إييييه .. هو فيه إييييييه
***فاصل موسيقي ***
مسمع 4
” صوت خطوات تجري و صوت سارينة الشرطه ”
الظابط :- إنزلي كدا و وريني بطاقتك
بيبا :-” تصيح بخوف ” أنا ما ليش دعوه .. هو إلي جابني هنا
آدم :-” بصوت مرتعد ” حاضر .. حاضر .. إتفضل البطاقة أهيه .. أنا أصلا تايه في الحته دي
الضابط :- إيه دا .. دا إنته مهندس .. إيه إلي جايبك هنا
آدم :- فيه واحد صاحبي باعتلي حاجات من بره مع واحد إسمه سيد حلاوه .. و هو وصفلي العنوان هنا .. أنا أول مره أصلا أجي المنطقة دي و المصيبه إني كمان تهت في العنوان
الظابط :- طيب ما تكلمه كدا
آدم :- ما هيا دي المشكله إلي توهتني .. الحته هنا كلها مافيش فيها أي شبكه خالص
الظابط :- طيب إتفضل .. و لو سمحت ما توقفش هنا تاني
آدم :- والله عمري في حياتي ما هاعتب هنا تاني أبدا
بيبا :- ” بصوت عصبي ” مشينا من هنا يلااااااا
آدم :- ألف منين أنا دلوقت بس
بيبا :- لأ .. تلف إيه .. مافيش أصلا حته تلف منها .. إرجع بظهرك أحسن بس واحده واحده والنبي يا آدم
آدم :- أه فعلا .. مافيش غير كدا
” صوت خبطه علي جسم السيارة ”
صوت شاب يصرخ :- آآآآآآه .. حااااسب يا عااام .. رجلااااااي